QUEZON CITY — Mananatiling kontrolado ng pamilya Lopez ang ABS-CBN sa kabila ng pagpasok ng bagong malaking investment na nagkakahalaga ng ₱6 bilyon, ayon sa mga opisyal ng kumpanya nitong Miyerkules.
Inaprubahan ng mga stockholder ng ABS-CBN ang panibagong investment sa ginanap na Special Stockholders’ Meeting.
Ang ₱6 bilyong bagong puhunan ay manggagaling sa tatlong sangay ng pamilyang Lopez—Crème Investment Corporation, Mantes Corporation, at Presta Holding Company—kasama ang bagong investor na I&C Holdings Corporation.
Ayon kay ABS-CBN Chairman Mark Lopez, patuloy na magkakaroon ng malaking papel ang pamilya Lopez sa pagtukoy ng strategic direction ng kumpanya.
“Lopez, Inc., together with its stockholders, Crème, Mantes and Presta, and together with ABS-CBN, will continue to determine ABS-CBN’s strategic direction,” ani Lopez.
Sinabi rin niyang kokonsultahin ang bagong major investor at igagalang ang mga karapatan nito bilang shareholder.
Bukod sa bagong puhunan, inaprubahan din ng mga stockholder ang pagtaas ng authorized capital stock ng ABS-CBN mula ₱1.5 bilyon hanggang ₱4.5 bilyon.
Itinaas din ang bilang ng mga miyembro ng Board of Directors mula pito hanggang siyam. Isusumite pa sa Securities and Exchange Commission (SEC) para sa approval ang mga pagbabagong ito.
Samantala, sinabi ni ABS-CBN President and CEO Carlo Katigbak na inaasahang magpapalakas sa financial position ng kumpanya ang bagong investment.
Gagamitin umano ang karagdagang pondo para sa working capital requirements at pagpopondo sa mga hakbang upang maisulong ang turnaround initiatives ng kumpanya.
Ayon kay Katigbak, layunin ng mga hakbang na palakasin ang pangmatagalang prospects ng ABS-CBN at makalikha ng halaga para sa lahat ng stockholder.
