ROMBLON — Mas mapapadali ang biyahe patungo at mula sa Romblon at Aklan sa inaasahang paglulunsad ng bagong ruta ng Starlite Ferries Incorporated bago matapos ang taon.
Batay sa mga source ng Romblon News Network, tatahakin ng bagong serbisyo ang rutang Batangas–Romblon–Dumaguit, Aklan, na magbibigay ng karagdagang opsyon sa mga biyahero na bumibiyahe sa pagitan ng mga lalawigan.
Bahagi umano ito ng pagpapalawak ng serbisyo ng Starlite Ferries upang mapahusay ang koneksyon sa mga pangunahing destinasyon at gawing mas madali at maginhawa ang pagbiyahe, pag-uwi at pagbisita sa Romblon.
Inaasahang maglalabas pa ang kompanya ng karagdagang detalye tungkol sa eksaktong iskedyul ng biyahe, dalas ng paglalayag at iba pang impormasyon kaugnay ng bagong ruta.
Kapag naisakatuparan, inaasahang makatutulong ang bagong ruta sa pagpapalakas ng koneksyon sa paglalakbay at turismo sa pagitan ng Romblon at Aklan.
