MANILA — Itinanggi ng dating engineer ng Department of Public Works and Highways (DPWH) ang alegasyong pineke niya ang inspection certificate para sa isang road dike project sa Naujan, Oriental Mindoro.
Sa kanyang judicial affidavit na iniharap sa Sandiganbayan Sixth Division, mariing itinanggi ni Felisardo Casuno, dating project engineer ng DPWH-MIMAROPA, ang paratang laban sa kanya.
Gayunman, inamin ni Casuno na umaasa siya minsan sa mga ulat ng contractor dahil sa dami ng proyekto at limitadong tauhan na nakatalaga sa kanilang grupo.
Sa pagtatanong ni Associate Justice Kevin Vivero, sinabi ni Casuno na kontrolado ng contractor ang mga materyales at manggagawa sa lugar kaya praktikal para sa kanilang team na umasa rin sa mga isinumiteng report.
Ayon kay Casuno, tatlong beses isinagawa ang pagtutusok ng steel sheet piles sa proyekto, ngunit isang beses lamang siyang nakapunta sa aktibidad noong Marso 2024.
Alam umano niya ang dalawa pang pagkakataon ngunit hindi siya nakapagpadala ng tauhan dahil sa dami ng kanilang trabaho at iba pang proyektong kailangang inspeksyunin.
Sa naunang inspeksyon na pinangunahan ni DPWH Secretary Vince Dizon, natuklasang nasa tatlong metro lamang ang lalim ng pagkakabaon ng mga sheet pile, gayong 12 metro ang kinakailangan batay sa Detailed Engineering Design ng proyekto.
Nauna ring sinabi ni Dizon sa kanyang testimonya na hindi maayos ang pagkakagawa sa road dike at may mga bahagi itong gumuho matapos umulan.
Tinanong ni Vivero kung inaasahang naroon ang project engineer sa mga kritikal na gawain gaya ng pile driving.
Sumagot si Casuno na mahalaga sanang naroon siya, ngunit hindi niya kayang puntahan araw-araw ang lahat ng proyekto dahil sa dami at layo ng mga ito.
Sinabi niyang nagsasagawa siya ng site inspection nang hindi bababa sa dalawang beses kada buwan kung pinapayagan ng kanyang iskedyul.
Ayon pa kay Casuno, tatlong tauhan lamang ang nakatalaga sa Oriental Mindoro—isang inspector at dalawang contract-of-service worker.
Mahigit 60 proyekto umano ang kanyang pinangangasiwaan sa Naujan lamang, bukod pa sa mga kahilingan ng iba pang opisyal na tugunan ang mga problema at pagkaantala sa konstruksyon sa ibang lugar.
Iginiit naman ng depensa na tatlo hanggang apat lamang ang project engineer ng DPWH para sa humigit-kumulang 200 aktibong proyekto.
Sumang-ayon si Casuno na nakadagdag sa problema ang mahabang proseso ng accreditation ng mga engineer. Aniya, dumaan siya sa ilang antas ng accreditation bago naging Project Engineer III matapos ang ilang taon.
Samantala, inakusahan ng prosekusyon sina Casuno at iba pang opisyal ng DPWH-MIMAROPA na nagsabwatan umano sa paglilipat o maling paggamit ng pondo ng gobyerno sa pamamagitan ng umano’y pagpapalsipika ng mga disbursement voucher at inspection document para sa proyekto.
Ang kaso ay kabilang sa mga kasong may kaugnayan sa road dike project sa Naujan at iba pang akusadong opisyal, kabilang ang dating Ako Bicol Rep. Zaldy Co.
