NAUJAN, Oriental Mindoro — Puspusan na ang pagsasagawa ng river rechanneling sa Purok 7, Barangay Del Pilar, Naujan, Oriental Mindoro, upang mapabuti ang daloy ng tubig at mabawasan ang panganib ng pag-apaw ng ilog tuwing malakas ang ulan.
Personal na binisita ni Naujan Mayor Henry Joel Teves ang kasalukuyang operasyon na isinasagawa ng pamahalaang bayan sa pamamagitan ng Municipal Engineering Office, katuwang ang Sangguniang Barangay ng Del Pilar.
Layunin ng proyekto na mapahusay ang daluyan ng tubig sa ilog at makatulong na maiwasan ang pagbaha sa mga kalapit na komunidad, lalo na sa panahon ng malalakas na pag-ulan.
