SAN JOSE, Occidental Mindoro – Kumpirmado na ang pagsasama ng dating mahigpit na magkatunggali sa pulitika na sina incumbent Congressman Leody “Odie” Tarriela at dating kongresista na si Josephine Ramirez-Sato sa 2028 elections.
Inanunsyo ni Tarriela ang kanilang pagsasama sa pagdiriwang ng kaniyang ika-58 kaarawan nitong Biyernes na dinaluhan ng mga kaibigan, pamilya at kaalyado sa pulitika mula sa mga board members at mga mayors ng Occidental Mindoro.
Si Sato ang tatakbong gobernador ng Occidental Mindoro sa ilalim ng ticket ni Tarriela na tatangkain na makuha ang huling termino.
“lately ko na lang narealized na yung ginagawa ni Cong. Nene ay kailangang-kailangang ipagpatuloy , yung nasimulan niya kailangan kong ipagpatuloy kaya ako ay nagpapasalamat, lately nakapag-usap kami at ang napag-usapan namin magsasama po kami siya ang magiging gobernador ,ang Congressman Odie po ang mananatiling kongresista ng lalawigan ng Occidental Mindoro” sabi ni Tarriela.
Umani ng palakpakan ang anunsyo ni Tarriela na aniyang matagal ng hinihintay ng mga Mindoreño.
“at sigurado pong yung tandem na Odie at Nene Sato ay mas magiging maunlad ang lalawigan ng Occidental Mindoro” dagdag ni Tarriela.
Noong 2025 elections, naging mahigpit na magkalaban sa pagka-kongresista sina Tarriela at Sato .
Ang anunsyo ng mambabatas ay nagtuldok na sa matagal ng usap-usapan sa Occidental Mindoro na may lamat na ang samahan nina Tarriela at Gadiano.
Noon ay binansagang hindi matitibag ang TGT na binubuo nina Tarriela, Gadiano at Vice Gov. Diana Apigo -Tayag.
Si Tarriela ay nasa ticket noon ni Gov. Eduardo Gadiano na inaasahang niyang makakalaban sa susunod na halalan sa pagkakongresista.
Nananatili naman sa partido ni Gadiano si Tayag na desidido na rin tumakbong gobernador.
