OCCIDENTAL MINDORO – Isang patay na green sea turtle o pawikan ang narekober ng mga tauhan ng Coast Guard Station Sablayan at Department of Environment and Natural Resources Office o DENR higit 100 metro ang layo mula sa shoreline ng Sablayan Feeder Port sa Barangay Poblacion noong Miyerkoles.
Sa pagsusuri ng DENR, napansin ang isang pisi ng pangisda na nakausli mula sa puwit ng pawikan, na posibleng nakapag-ambag sa pagkamatay nito.
Tinatayang isang linggo na itong patay nang matagpuan.
Kinilala ang pawikan bilang isang babaeng green sea turtle na may habang 90 sentimetro at lapad na 80 sentimetro. Tinatayang nasa 50 hanggang 60 taon na ang edad nito.
Matapos ang pagsusuri, dinala ang labi ng pawikan sa Zone 1, Barangay Poblacion, Sablayan, kung saan ito maayos na inilibing sa pakikipag-ugnayan sa CENRO Sablayan, alinsunod sa mga itinakdang protocol sa pangangalaga ng mga wildlife at konserbasyon.
