QUEZON CITY – Nasungkit ng Pamahalaang Panlalawigan ng Occidental Mindoro ang apat na parangal sa B.E.A.C.O.N. 2026 DILG MIMAROPA Regional SubayBAYANI Awards na ginanap noong Oktubre 15 sa Madison 101 Hotel sa Quezon City.
Sa ilalim ng pamumuno ni Governor Eduardo “Ed” Gadiano, kinilala ang lalawigan dahil sa kahusayan sa pamamahala, pagsubaybay sa mga proyekto, transparency, at pananagutan sa pagpapatupad ng mga programa ng pamahalaan.
Kabilang sa mga parangal na natanggap ng Occidental Mindoro ang Outstanding Provincial LGU Performer, Best Local Project Monitoring Committee, 2026 SubayBAYAN Performance Award, at B.E.A.C.O.N. Regional Exemplars.
Ayon sa pamahalaang panlalawigan, naging mahalaga sa tagumpay ang pagtutulungan ng DILG Occidental Mindoro, Provincial Engineering Office, at Provincial Planning and Development Office upang matiyak ang maayos na pagpapatupad at epektibong pagsubaybay sa mga proyektong pang-imprastraktura at iba pang programa.
Kinilala rin sa naturang awarding ceremony ang mga lokal na pamahalaan ng Looc, Lubang, Mamburao, Sablayan, at Magsaysay para sa kanilang natatanging pagsisikap na isulong ang mahusay na pamamahala.
Patuloy namang isinusulong ng administrasyong Gadiano ang mga programang naglalayong matiyak na maayos na naipatutupad ang mga proyekto at direktang napakikinabangan ng mga mamamayan ng Occidental Mindoro.
