LUCENA CITY — Pinasinayaan ng lalawigan ng Quezon ang mas malaki at modernisadong emergency room sa Quezon Provincial Health Network–Quezon Medical Center upang matugunan ang pangangailangan ng mas maraming pasyente at mapabuti ang access sa serbisyong medikal.
Dumalo sa inagurasyon sina Quezon Governor Helen Tan, Philippine Health Insurance Corp. (PhilHealth) President at Chief Executive Officer Beverly Lorraine C. Ho, at Senator JV Ejercito. Pinondohan ang bagong pasilidad mula sa 20 porsiyentong development fund ng pamahalaang panlalawigan.
May lawak na 1,698.75 metro kuwadrado ang emergency room at mayroon itong isolation room, minor operating room, silid para sa tainga, ilong at lalamunan (ENT) at ophthalmology, behavioral area, laboratoryo, botika at iba pang pasilidad.
Kasabay ng seremonya ang turnover ng mga bagong kagamitang medikal, kabilang ang automated chest compression machine, mga multi-parameter patient monitor, infant incubator, syringe pump at mechanical ventilator.
Sa kanyang maikling mensahe, pinasalamatan ni Ejercito si Tan sa pagbibigay-prayoridad sa sektor ng kalusugan. Aniya, may direktang epekto sa buhay ng mga tao ang pamumuhunan sa pangangalagang pangkalusugan.
“Mahalagang binibigyang-prayoridad ang pangangalagang pangkalusugan dahil nararamdaman ng bawat mamamayan ang epekto nito,” ani ng senador.
Kinilala ni Tan na may mga hamon pa rin sa sektor ng kalusugan sa lalawigan, ngunit sinabi niyang patuloy na pag-iigihin ng pamahalaang panlalawigan ng Quezon ang mga pasilidad at serbisyong medikal para sa mga residente.
