SANTA CRUZ, Laguna — Libu‑libong taga‑Laguna na nakakakuha ng libreng gamot pang‑maintenance sa ilalim ng programang “Akay ni Gob Botika” ni Gobernador Sol Aragones ay nakakatipid ng malaki sa kanilang mga gastusing pang‑kalusugan.
Tinatayang nakakatipid ang mga benepisyaryo ng ₱2,715 bawat buwan o ₱32,580 bawat taon. Sa kabuuan sa loob ng tatlong taong termino ng Gobernador Aragones, aabot sa halos ₱100,000 ang kabuuang tipid ng mga pasyente.
Inanunsyo ni Dr. Odillon Inoncillo, pinuno ng Provincial Health Office, ang computation ng tinatayang tipid para sa mga karaniwang iniresetang gamot na ibinibigay nang libre sa mga kwalipikadong benepisyaryo:
‑ Amlodipine: ₱292.50 buwan‑buwan, ₱3,510 taon‑taon, ₱10,676 sa loob ng tatlong taon
‑ Losartan: ₱517.50 buwan‑buwan, ₱6,210 taon‑taon, ₱18,888 sa loob ng tatlong taon
‑ Metformin: ₱187.50 buwan‑buwan, ₱2,250 taon‑taon, ₱6,844 sa loob ng tatlong taon
‑ Atorvastatin: ₱532.50 buwan‑buwan, ₱6,390 taon‑taon, ₱19,436 sa loob ng tatlong taon
‑ Clopidogrel: ₱1,005 buwan‑buwan, ₱12,060 taon‑taon, ₱36,682 sa loob ng tatlong taon
‑ Vitamin B‑Complex: ₱180 buwan‑buwan, ₱2,160 taon‑taon, ₱6,570 sa loob ng tatlong taon
Ayon kay Dr. Inoncillo, ang mga gamot na ito ay para sa mga karaniwang malalang sakit tulad ng mataas na presyon ng dugo, diabetes, at mataas na kolesterol — mga karamdaman na nangangailangan ng matagalang paggamot na maaaring magpabigat sa badyet ng pamilya.
Ipinaliwanag ni Gobernador Sol Aragones na ang programang “Akay ni Gob Botika at Libreng Maintenance na Gamot” ay binuo upang mabawasan ang pasanin ng mga pamilyang may miyembro na kailangang uminom ng gamot habang buhay. Binigyang‑diin niya na bukas ito para sa lahat ng taga‑Laguna anuman ang kanilang estado sa buhay.
“Wala po kaming pinipili sa mga libreng gamot pang‑maintenance. Para po ito sa lahat, mahirap ka man o may kaya, dahil ito ay buwis ng mamamayan na dapat pakinabangan ng lahat. Hangga’t ako po ang inyong gobernador, mananatiling libre ang mga gamot pang‑maintenance sa Laguna,” ayon kay Gobernador Aragones. l
Bukas pa rin ang programa para sa mga kwalipikadong pasyente sa mga itinalagang istasyon ng kalusugan ng lalawigan at sa mga iskedyul ng mga mobile clinic.
