ROSARIO, Batangas — Arestado ang isang 30-anyos na lalaki matapos umanong tangkaing pasukin at pagnakawan ang sangay ng Philippine National Bank (PNB) sa Barangay Poblacion C, Rosario, Batangas, ayon sa pulisya.
Ayon sa Batangas Police Provincial Office, dakong alas-5:15 ng hapon nitong Sabado nang makatanggap ng tawag ang mga pulis mula sa isang concerned citizen hinggil sa isang lalaki na pilit binubuksan ang glass door ng bangko.
Agad na rumesponde ang quick response team ng Rosario Municipal Police Station at nadatnan ang suspek na nakapasok na sa loob ng bangko.
Kaagad na inaresto ang lalaki na armado ng baril.
Nasamsam mula sa suspek ang isang kalibre .45 na pistola at mga bala.
Nahaharap ang suspek sa kasong attempted robbery at paglabag sa Republic Act No. 10591 o Comprehensive Firearms and Ammunition Regulation Act.
