MANILA – Tinatayang 201,000 kasambahay sa CALABARZON ang makatatanggap ng dagdag-sahod na ₱750 kada buwan, kaya aakyat sa ₱7,500 ang kanilang minimum na buwanang sahod simula Oktubre 26.
Alinsunod ito sa Wage Order No. RB-IVA (CALABARZON)-DW-06 na sumasaklaw sa mga kasambahay sa Batangas, Cavite, Laguna, Quezon at Rizal.
Kabilang sa mga makikinabang ang mga stay-in at stay-out na kasambahay, gaya ng mga katulong sa bahay, yaya, kusinero, hardinero at tagalaba.
Hindi naman saklaw ng kautusan ang mga family driver, service provider, at mga manggagawang paminsan-minsan o hindi regular na kinukuha para sa trabaho.
Ayon kay Labor Secretary Francis N. Tolentino, inaprubahan ng National Wages and Productivity Commission ang dagdag-sahod matapos isaalang-alang ang kalagayang pang-ekonomiya ng rehiyon, pangangailangan ng mga kasambahay at kakayahan ng mga employer na magbayad.
Nagsagawa rin ng mga konsultasyon at pampublikong pagdinig sa Cavite, Rizal, Quezon at Laguna bago ipatupad ang bagong minimum wage.
Epektibo ang bagong sahod sa Oktubre 26, o 15 araw matapos mailathala ang wage order.
Walang pinapayagang exemption sa kautusan, at kailangang bayaran ng mga employer ang sahod ng kanilang mga kasambahay nang cash, hindi bababa sa isang beses kada buwan.
Maaari namang magkasundo ang employer at kasambahay sa mas mataas na sahod batay sa kakayahan at performance ng manggagawa.
Nagbabala rin ang Department of Labor and Employment (DOLE) na maaaring maharap sa kaukulang parusang legal ang mga employer na hindi susunod sa itinakdang minimum wage o lalabag sa Republic Act No. 10361, o Batas Kasambahay.
Sa pamamagitan ng DOLE Regional Office IV-A, mahigpit na babantayan ang pagpapatupad ng bagong wage order upang matiyak na nasusunod ito ng mga employer sa buong CALABARZON.
