TANAUAN CITY – Inilabas na ng Tanauan City Police ang kuha CCTV footage na makatutulong sa pagkilala sa mga suspek sa pagpatay sa dating chairman ng Barangay Bañadero na si Emeterio Awitan, 66 anyos.
Ayon sa pulisya, nakasuot ng itim na jacket at asul na pantalon ang driver ng motorsiklo. Ang angkas naman na hinihinalang gunman ay nakasuot ng puting T-shirt, pulang jacket, asul na pantalon at puting sapatos.
Sa kuha ng CCTV bago ang krimen, makikitang sinusundan na ng mga suspek na sakay ng motorsiklo ang ang biktima habang binabagtas ang Provincial Road sa Barangay Talaga gayunman, hindi nakunan ng CCTV ang aktuwal na pamamaril.
Sa isa pang CCTV footage matapos ang krimen, makikita ang mga suspek na tumatakas. Mapapansin ding wala na hinubad na ng gunman ang pulang jacket na suot niya ng isagawa ang krimen.
Naganap ang pananambang bandang alas-5:16 ng hapon nitong Biyernes habang sakay ng kaniyang motorsiklo si Awitan at patungo sa direksiyon ng city proper.
Pinagbabaril umano siya ng mga suspek gamit ang kalibre .45 na baril.
Isinugod pa si Awitan sa Tanauan Medical Center ngunit idineklarang dead on arrival.
Patuloy na inaalam ng mga awtoridad ang motibo sa krimen.
Kabilang sa mga sinusuri ng pulisya ang umano’y suntukan ng biktima at isang katrabaho sa city hall, gayundin ang posibleng kaugnayan ng pulitika o alitan sa trabaho.
