DA-MIMAROPA, DPWH LUMAGDA SA ₱430-M KASUNDUAN PARA SA 29 FARM-TO-MARKET ROADS
Quezon City — Lumagda ang Department of Agriculture–MIMAROPA (DA-MIMAROPA) at Department of Public Works and Highways (DPWH) sa isang Memorandum of Agreement (MOA) para sa pagpapatupad ng 29 farm-to-market road (FMR) projects na nagkakahalaga ng kabuuang ₱430 milyon sa iba’t ibang bahagi ng MIMAROPA Region.
Isinagawa ang paglagda sa kasunduan noong Setyembre 28 sa DPWH Regional Office sa Quezon City bilang bahagi ng pagpapatupad ng mga FMR project na nakapaloob sa General Appropriations Act (GAA) ng DA para sa Fiscal Year 2026.
Layunin ng mga proyekto na mapabuti ang koneksyon ng mga lugar na produksyon ng agrikultura sa mga pamilihan sa pamamagitan ng mas maayos na mga kalsadang magagamit ng mga magsasaka at iba pang nasa sektor ng agrikultura.
Inaasahang makatutulong ang mga farm-to-market road sa mas mabilis na pagdadala ng mga produktong agrikultural, gayundin sa pagpapababa ng gastos at pagpapadali ng access ng mga magsasaka sa mga pamilihan at iba pang serbisyo.
Saklaw ng kasunduan ang mga FMR project sa iba’t ibang lalawigan ng MIMAROPA Region, bilang bahagi ng patuloy na mga hakbang ng pamahalaan upang suportahan ang sektor ng agrikultura at mapalakas ang ugnayan ng mga komunidad na nagsasaka sa mga pamilihan.
