LAGUNA – Natagpuan na ang 5 taong gulang na bata na tinangay sa eskwelahan sa Calamba City, Laguna ng lalaking dating kinakasama ng kaniyang lola.
Ayon kay Erica Jane Crystal, nakita ang kaniyang anak sa simbahan sa Tanay, Rizal.
Isang tawag mula sa isang concerned citizen ang kanilang natanggap upang ipaalam na natagpuan ang bata.
Sabi ni Erica, may nakasulat na contact number at pangalan ng mama sa notebook na bitbit ng kaniyang anak kaya natawagan siya.
Pero iba na ang suot na damit ng bata at madungis na ito ng matagpuan, may kalyo at may kaunting sugat dahil umano sa kakalakad.
Kwento umano ng bata, mula ng tangayin siya ng suspek ay hindi na siya pinakain.
Wala umanong pera ang suspek at sumakay sa jeep ng hindi nagbabayad.
Sa isang nakaparadang jeep lamang umano sila natutulog.
Patuloy naman ang pagtugis ng mga otoridad sa suspek.
